
遍知贝玛嘎波大师教言集PK137དྲིལ་བུ་ལྷ་ལྔའི་དབང་ཆོག་དབང་བསྐུར་སྙིང་པོ་གསལ་བྱེད་ཅེས་བྱ་བ།
15-217
༄༅། །དྲིལ་བུ་ལྷ་ལྔའི་དབང་ཆོག་དབང་བསྐུར་སྙིང་པོ་གསལ་བྱེད་ཅེས་བྱ་བ།
༄། །མདུན་བསྐྱེད།
༄༅། །དྲིལ་བུ་ལྷ་ལྔའི་དབང་ཆོག་དབང་བསྐུར་སྙིང་པོ་གསལ་བྱེད་ཅེས་བྱ་བ་བཞུགས་སོ། ། ༄༅། །བླ་མ་དང་བཅོམ་ལྡན་འདས་དཔལ་འཁོར་ལོ་སྡོམ་པ་ལ་ཕྱག་འཚལ་ལོ།། འདིར་དཔལ་འཁོར་ལོ་
སྡོམ་པ་ལྷ་ལྔའི་དཀྱིལ་འཁོར་གྱི་ཆོ་ག་ནི། ས་ཆོག་དང་སྟ་གོན་སོགས་སྔོན་དུ་འགྲོ་བའི་རིམ་པ་གཞན་དུ་ཤེས་པར་བྱ་ལ། འདིར་དུས་རྒྱུན་དུ་ཉམས་སུ་བླང་བའི་རིམ་པ་ནི། སྔོན་
འགྲོ་གཏོར་མ་བཏང་། བདག་བསྐྱེད་བཟླས་པའི་བར་བྱས་ནས་མདུན་བསྐྱེད་ཀྱི་དཀྱིལ་འཁོར་ཁཎྜ་རོ་ཧེས་བསངས། སྭ་བྷཱ་ཝ་དང་ཤཱུ་ནྱ་ཏཱས་སྦྱངས། སྟོང་པའི་ངང་ལས་ཆོས་འབྱུང་གི་རང་བཞིན། དེའི་དབུས་སུ་
ཡཾ་ལས་རླུང་གི་དཀྱིལ་འཁོར་གཞུའི་དབྱིབས་ཅན་རྒྱལ་མཚན་གྱིས་མཚན་པ། དེའི་སྟེང་དུ་རྃ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་ཆུའི་དཀྱིལ་འཁོར་དཀར་པོ་ཟླུམ་པོ་
བུམ་པ་ཆུས་གང་བས་མཚན་པ། དེའི་སྟེང་དུ་སའི་དཀྱིལ་འཁོར་གྲུ་བཞི་སེར་པོ་ཟུར་བཞིར་རྡོ་རྗེ་རྩེ་གསུམ་པས་མཚན་པ། དེའི་སྟེང་དུ་སུཾ་ལས་རི་རབ་རིན་པོ་ཆེ་སྣ་བཞིའི་རང་བཞིན་
ཅན་རྩེ་མོ་ལྕོག་བརྒྱད་ཀྱིས་མཚན་པ། དེའི་སྟེང་དུ་པྃ་ལས་སྣ་ཚོགས་པདྨ་འདབ་མ་བརྒྱད་པ། དེའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཕྱོགས་ཀྱི་མདོག་ཅན་དེའི་ལྟེ་བར་བྷྲཱུཾ་ལས་འཁོར་ལོ་དཀར་པོ་ཡོངས་སུ་གྱུར་པ་ལས། 
15-218
གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་བཅས་པ། རྩིག་པ་ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བ། སྟེང་འོག་གི་ཁ་དོག་ཀྱང་གཡོན་སྐོར་གྱིས་དེ་དང་འདྲ་བ། རྩིག་
པའི་སྟེང་དུ་རིན་པོ་ཆེའི་སྣམ་བུ་དམར་པོ་ཁྲ་སྣ་ཚོགས་ཀྱིས་མཛེས་པ། དེའི་སྟེང་དུ་ཆུ་སྲིན་གྱི་ཁ་ནས་འཕྱང་བའི་དོ་ཤལ་དང་དོ་ཤལ་ཕྱེད་པ། དེའི་སྟེང་དུ་བྱ་འདབ་ལས་འཕྱང་
བའི་བ་ཀུ་ལཱི་དཀར་པོ། དེའི་སྟེང་དུ་ཀྲ་མ་ཤཱིརྵ་པདྨ་འདབ་མ་ཕྱེད་པའི་དབྱིབས་ཅན། དེ་དག་གི་བར་བར་དུ་བུམ་པ་ལ་གནས་པའི་རྒྱལ་མཚན་དང་བ་དན་རླུང་གིས་བསྐྱོད་པའི་དྲིལ་
བུ་གཡེར་ཁའི་སྒྲ་དང་ལྡན་པ། ཕྱི་ནས་འདོད་ཡོན་གྱི་སྣམ་བུ་དམར་པོས་བསྐོར་བའི་སྟེང་ན། གཟུངས་མ་རྣམས་ཀྱིས་མཆོད་རྫས་སྣ་ཚོགས་ཐོགས་པ། སྒོ་དང་སྒོ་ཁྱུད་ཀྱི་མཚམས་སུ་ཟླ་ཕྱེད་རྡོ་
རྗེ་རིན་པོ་ཆེས་སྤྲས་ཤིང་། རིན་པོ་ཆེའི་ཀ་བ་ཕྱོགས་མདོག་ཅན་བརྒྱད་ཀྱིས་བཏེག་པའི་སྟེང་དུ་རྡོ་རྗེའི་གདུང་ཟླུམ་གྱིས་ཕུབ་པ། རྩེ་མོ་རྡོ་རྗེ་རིན་པོ་ཆེའི་ཏོག་ཅན། །ཕྱི་རོལ་ཏུ་རྣམ་
ཤེས་བརྒྱད་དག་པའི་དུར་ཁྲོད་བརྒྱད་ཀྱིས་བསྐོར་བའི་གཞལ་ཡས་ཁང་དེའི་ནང་དུ་པྃ་ལས་སྣ་ཚོགས་པདྨ་འདབ་མ་བརྒྱད་པ་མུ་ཁྱུད་ལ་གྲི་གུག་གི་འཕྲེང་བས་བསྐོར་བ། དེའི་ལྟེ་བར་ཨ་ལས་ཟླ་བའི་དཀྱིལ་འཁོར། 
15-219
རྃ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་སྔོན་པོ་དང་པྃ་དམར་པོ་ལས། ཞེས་པ་ནས། བཞུགས་པར་གྱུར་གྱི་བར་བདག་བསྐྱེད་བཞིན་དང་། ཤར་གྱི་འདབ་མ་མཁའ་འགྲོ་མ་སྡོན་མོ། བྱང་དུ་
ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་མོ། །ལྷོར་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་སྤྱན་གསུམ་མ། མཆེ་བ་བཞི་གཙིགས་པ། གཅེར་མོ་སྐྲ་གྲོལ་བ། ཐོད་སྐམ་ལྔས་དབུ་བརྒྱན་
པ། དུམ་བུ་ལྔ་བཅུའི་དོ་ཤལ་དང་ལྡན་པ། ཕྱག་རྒྱ་ལྔས་བརྒྱན་པ། ཕྱག་བཞིའི་གཡས་གྲི་གུག་དང་ཌཱ་མ་རུ། གཡོན་ཐོད་པ་ཁྲག་གིས་གང་བ་དང་ཁ་ཊཱྃ་ག་བསྣམས་པ། ཐམས་ཅད་རོ་
དང་ཟླ་བ་ལ་གཡོན་བརྐྱང་གིས་བཞུགས་པའོ། །མཚམས་ཀྱི་ཟླ་གདན་ལ་བུམ་པ་བདུད་རྩིས་གང་བའི་སྟེང་དུ་ཀ་པཱ་ལ་བྱང་ཆུབ་ཀྱི་སེམས་ཀྱིས་གང་བ་བཞིས་ཁ་བརྒྱན་པའོ།། སྐུ་གསུང་ཐུགས་བྱིན་
གྱིས་བརླབ་པ། གོ་བགོ་བ། ཡེ་ཤེས་པ་དགུག་གཞུག་བྱ་བ། དབང་བསྐུར་རྒྱས་གདབ་པ་རྣམས་བདག་བསྐྱེད་ལྟར་རོ། །ཕྱོགས་མ་བཞི་ལ། མཁའ་འགྲོ་མ་ལ་རྣམ་སྣང་། ལཱ་མ་ལ་དོན་གྲུབ། དུམ་སྐྱེས་
མ་ལ་འོད་དཔག་མེད། གཟུགས་ཅན་མ་ལ་རིན་འབྱུང་གིས་དབུ་བརྒྱན་པར་བསམ་མོ།། གཙོ་བོ་ཡབ་ཡུམ་དང་མཁའ་འགྲོ་མ་བཞིའི་སྔགས་ཀྱི་མཇུག་ཏུ། ཨརྒྷཾ་སོགས་བཏགས་པའི་ཆུ་གཉིས་དང་། ཉེར་སྤྱོད་ལྔ། 
15-220
རིན་ཆེན་སྣ་བདུན། འདོད་ཡོན་ལྔ། རིག་མ་བཅུ་དྲུག །ཁྱད་པར་བདུད་རྩིའི་མཆོད་པ་དང་དེ་ཁོ་ན་ཉིད་ཀྱིས་མཆོད་ལ། མི་བསྐྱོད་རྡོ་རྗེ་ཡེ་ཤེས་ཆེ།། ཞེས་སོགས་ཀྱིས་བསྟོད། བཟླས་པ་ཅུང་ཞིག་
བྱ། གཏོར་མ་འབུལ་བའོ།། །།
༄། །བུམ་པ་བསྒྲུབ་པ།
དེ་ནས་བུམ་པ་མཚན་ཉིད་དང་ལྡན་པ་ས་དཀར་གྱིས་བྱུགས། རས་ཟུང་གིས་མགུལ་པ་བཅིངས། འབྲས་བུ་ཅན་གྱི་ཤིང་གིས་ཁ་བརྒྱན་པའི་ནང་དུ། ཨོཾ་ཏཔྟེ་ཏཔྟེ་མ་ཧཱ་
ཏཔྟེ་སྭཱ་ཧཱ། ཞེས་པས་ལྷའི་དལ་འགྲོའི་ཆུ་བཀུག་པར་བསམས་ནས། རྡོ་རྗེ་ལ་བརྟེན་པའི་ཆུས་སུམ་གཉིས་ཙམ་དགང་། སྨན་ལྔ། འབྲུ་ལྔ། དྲི་ལྔ། རིན་པོ་ཆེ་ལྔ། སྙིང་པོ་ལྔ་རྣམས་བཅུག །རྣམ་རྒྱལ་
གྱི་སྟེང་དུ་དུང་ཆོས་ཀྱི་ཆུ་ལ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཋཿཧཱུྃ་བཟླས་ཤིང་། དེའི་སྟེང་དུ་རྡོ་རྗེ་ལ་མེ་ཏོག་གི་འཕྲེང་བ་བཏགས་ལ་བཞག །རྣམ་རྒྱལ་དང་རྣམ་རྒྱལ་ཆེན་པོའི་
དུང་ཆོས་གཉིས་བྷྲཱུཾ་ལས་གཞལ་ཡས་ཁང་གདན་བཅས་སུ་བསྐྱེད། དེར་ལྷ་དམ་ཚིག་པ་ལྔ་བུམ་པ་དང་བཅས་པ་མདུན་བསྐྱེད་བཞིན་བསྐྱེད། ལས་བུམ་དུ་པད་ཉིའི་སྟེང་དུ་པྃ་ལས་དུམ་སྐྱེས་མ་བསྐྱེད་
ནས། དབང་བསྐུར་བ་ཡན་ཆད་མདུན་བསྐྱེད་བཞིན་བྱས་ལ། མཆོད་བསྟོད་བདུད་རྩི་མྱང་བ་བྱས། མེ་ཏོག་གི་ལྕུག་མ་ནས་གཟུང་ལ། སོ་སོའི་སྔགས་བརྒྱ་རྩ་རེ་བཟླས། སླར་ཡང་མེ་ཏོག་བཅུག །སྤོས་ཀྱིས་བདུག །
15-221
གསོལ་བ་བཏབ། དུང་ཆོས་ཀྱི་ཆུ་བླུག་པའི་རྐྱེན་གྱིས། ལྷ་རྣམས་ཆགས་པ་ཆེན་པོའི་མེས་བཞུ། བྱང་ཆུབ་སེམས་ཀྱི་ཆུར་གྱུར་པར་བསམས་ཏེ། བུམ་པ་བསྒྲུབ་པའོ།། །།
༄། །དཀྱིལ་འཁོར་དུ་འཇུག་པའི་རིམ་པ།
དེ་ནས་སློབ་མ་ལས་ཐམས་ཅད་པ་
བཟླས་པའི་ཆུས་ཁྲུས་ལ། མེ་ཏོག་ཐོགས་ཏེ་མཎྜལ་ཕུལ་ནས། སངས་རྒྱས་ཀུན་གྱི་རང་བཞིན་སྐུ། །རྡོ་རྗེ་འཆང་ཆེན་ངོ་བོ་ཉིད། །དམིགས་མེད་བདེ་ཆེན་སྟོན་པ་པོ། །སློབ་དཔོན་ཆེན་པོ་ཕྱག་འཚལ་ལོ། །
དོན་དམ་སྨྲ་བའི་སེང་གེ་རྣལ་འབྱོར་ནས། གྲུབ་པར་མཛོད། ཅེས་ལན་གསུམ་གསོལ་པ་གདབ། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ྄། ཅེས་བརྗོད་པས་བསངས། སྟོང་པའི་ངང་ལས། སློབ་མ་དཔལ་འཁོར་ལོ་བདེ་མཆོག་
ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཁར་བསྣོལ་ནས་འཛིན་པ། གཡས་བརྐྱང་གི་སྟབས་ཀྱིས་བཞུགས་པར་བསྐྱེད་ནས། ལས་ཐམས་ཅད་པ་བཟླས་པའི་མིག་དར་དམར་པོ། །ཨོཾ་ཙཀྵུརྦནྡྷ་བ་ར་མཱ་ན་
ཡ་ཧཱུྃ། ཞེས་པས་མིག་དར་བཅིངས། ཨཿཁཾ་བཱི་ར་ཧཱུྃ་གིས་མེ་ཏོག་གི་འཕྲེང་བ་ལག་ཏུ་བཟུང་ལ། ལས་ཐམས་ཅད་པའི་ཆུས་བསངས་ཏེ། ཀྱེ་དགའ་བ་ལ་དགའ་ཁྱོད་སུ་ཞིག །དེས། བདེ་ཆེན་བདག་
ནི་བསྐལ་བཟང་ལགས།། ཞེས་དྲིས་ལན་གྱིས་རིགས་ངེས་པར་བྱ། སློབ་མའི་སྙིང་གར་ཟླ་བའི་སྟེང་དུ་རྡོ་རྗེ་རྩེ་ལྔ་བསྒོམས་ཏེ། ཨོཾ་སརྦ་ཡོ་ག་ཙིཏྟ་ཨུ་ཏྲཱ་ད་ཡཱ་མི། ཞེས་བརྗོད། མེ་ཏོག་དང་བཅས་པས་སློབ་མའི་སྙིང་གར་རེག་ནས། 
15-222
ཨོཾ་སུ་ར་ཏེ་ས་མ་ཡ་སྟྭཾ་ཧོཿསིདྡྷ་བཛྲ་ཡ་ཐཱ་སུ་ཁཾ། ཞེས་བརྗོད་ཅིང་དོན་བཤད་ཅིང་བསྒོམ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱིས། དེ་བཞིན་གཤེགས་པ་ཐམས་ཅད་
ཀྱི་མཆོག་ཏུ་གསང་བའི་དཀྱིལ་འཁོར་འདི། དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་ཞིང་། །མ་དད་པར་ཡང་མ་ཡིན་ནོ།། ཞེས་གསང་བར་གདམས། ལས་ཐམས་ཅད་པ་དང་ཨཿཁཾ་ཝཱི་ར་
ཧཱུྃ་གིས་ཡོལ་བའི་ནང་དུ་གཞུག །སྡོམ་པ་བསྒྲག་གཟུང་རྣམས་སྟ་གོན་མ་སོང་ན་སྐབས་འདི་ཉིད་དུ་བྱའོ། །མགོ་བོར་རྡོ་རྗེ་བཞག་ནས། དེང་ཁྱོད་དཔའ་བོ་དང་རྣལ་འབྱོར་མ་རྣམས་ཀྱིས་རིགས་སུ་
ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱ་ཡིས། ཁྱོད་
ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་བརྗོད་པར་མི་བྱ་སྟེ། དམ་ཚིག་ཉམས་པར་གྱུར་ཏ་རེ། ཞེས་མཐོང་བའི་ཕན་ཡོན་དང་། མགོ་བོར་རྡོ་རྗེ་བཞག །དྲིལ་བུ་དཀྲོལ་ཞིང་། འདི་ནི་ཁྱོད་
ཀྱི་དམ་ཚིག་རྡོ་རྗེ་ཡིན་ཏེ། ཚུལ་འདི་འགའ་ཞིག་ལ་སྨྲས་ན་མགོ་བོ་འགས་པར་བྱེད་དོ།། ཞེས་མ་གསང་པའི་ཉེས་དམིགས་དང་སྙིང་གར་རྡོ་རྗེ་བཞག་ནས། ཧེ་རུ་ཀ་དཔལ་དེང་ཁྱོད་ཀྱི། །
15-223
སྙིང་ལ་ཡང་དག་ཞུགས་པར་མཛད། གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་བྲལ་ཏེ་གཤེགས།། ཞེས་ཡེ་ཤེས་བབས་པ་གསང་མ་གསང་གི་ཕན་ཡོན་དང་ཉེས་དམིགས། པདྨའི་ནང་གི་བདུད་རྩི་
ལྔ་ལ་ཨོཾ་ཨཱཿཧཱུྃ་གིས་བྱིན་གྱིས་བརླབས་ནས། འདི་ནི་ཁྱོད་ཀྱི་དམྱལ་བའི་ཆུ།། ཞེས་པ་ནས། ཨོཾ་བཛྲ་ཨུ་ད་ཀ་ཋཿཋཿཞེས་པས་འཐུང་དུ་གཞུག །དམ་ཚིག་བསྲུངས་མ་བསྲུངས་ཀྱི་ཕན་ཡོན་ཉེས་དམིགས་ཀྱི་
སྒོ་ནས་དང་། དེང་ནས་བརྩམས་ཏེ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱིས། ཞེས་སོགས་ཀྱིས་བླ་མ་བཀའ་གཉན་པའི་སྒོ་ནས་དམ་ལ་བཞག་པར་བྱའོ། ། དེ་ནས་དེ་བཞིན་གཤེགས་པ་ཐམས་ཅད་ཀྱིས་
བྱིན་གྱིས་རློབས་ལ། དཔལ་རྡོ་རྗེ་སེམས་དཔའ་བདག་ལ་དབབ་ཏུ་གསོལ། ཞེས་གསོལ་བ་ལན་གསུམ་གདབ། སློབ་མ་སྐད་ཅིག་གིས་ཧེ་རུ་ཀར་གྱུར་པའི་སྤྱི་བོར་བཾ་ལས་ཆུའི་དཀྱིལ་འཁོར་བུམ་པས་མཚན་
པ་ལ་ཡི་གེ་ཧ། སྙིང་གར་ལཾ་ལས་སའི་དཀྱིལ་འཁོར་ལ་ཧཱུྃ། ལྟེ་བར་རྃ་ལས་མེའི་དཀྱིལ་འཁོར་ལ་ཨ། རྐང་པའི་འོག་ཏུ་ཡྃ་ལས་རླུང་གི་དཀྱིལ་འཁོར་ལ་ཡི་གེ་ཛྷྱཻཿདྲག་ཅིང་བཟོད་པར་
དཀའ་བ་བསམ། དེ་ཀའི་ངང་ལས་བླ་མ་དང་གཙོ་བོ་ཐ་མི་དད་པའི་ཐུགས་ཀ་ནས་འོད་ཟེར་འཕྲོས། རླུང་གིས་བ་དན་བསྒུལ། རླུང་གཡོས། མེ་སྦར། ཛྷྱཻཿརྐང་མཐིལ་ནས་སུམ་མདོའི་མེ་དང་འདྲེས། སྙིང་ག་སའི་དཀྱིལ་འཁོར་བསྲེགས། 
15-224
དེའི་དྲོད་ཀྱིས་དཔྲལ་བའི་ཆུ་ཁོལ། །སྙིང་གར་མེ་ཆུ་འཐབ་པའི་དྲོད་ཀྱིས་ཉམས་དཔག་ཏུ་མེད་པ་སྐྱེས། གཞན་ཡང་ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་བྱང་སེམས། དཔའ་བོ་དང་རྣལ་འབྱོར་
མའི་ཚོགས་སྤྱན་དྲངས་ཏེ། ལས་ཀྱི་རྡོ་རྗེས་གུ་གུལ་གྱིས་བདུག་ཅིང་། ཌཱ་མ་རུ་དང་དྲིལ་བུ་དཀྲོལ་ཞིང་། སྙིང་པོ་ཉེ་སྙིང་གི་རྗེས་སུ། ཨཱ་བེ་ཤ་ཡ་ཏོ་ཥ་ཡ། ར་ར་ར་ར།
ཙཱ་ལ་ཡ་ཙཱ་ལ་ཡ་ཧཱུྃ་ཧཿཨཿཛྷྱཻཿ ཞེས་བརྒྱའི་བར་བརྗོད་དེ་མགོ་བོར་རྡོ་རྗེ་བཞག །ཏིཥྛ་བཛྲ། ཞེས་པས་བརྟན་པར་བྱའོ། །དེ་ནས་ཤར་སྒོར་ལངས་ལ། ཨོཾ་ན་མཿཏེ་ཧཱུྃ། ན་མཱ་མི་ཧཱུྃ། ན་
མོ་ན་མཿཧཱུྃ་སྭཱ་ཧཱ།། བརྗོད་པས་ལུས་ངག་ཡིད་གསུམ་གྱི་ཕྱག་སྔོན་དུ་འགྲོ་བས་ཐལ་མོ་སྙིང་ཁའི་གཡོན་དུ་སྦྱར་ལ། ཨོཾ་སརྦྦ་ཝཱི་ར་ཡོ་གི་ནཱི་བྷྱཿཔཱུ་ཛོ་པཧྶྭུ་ན་ཡ་ཨཱཏྨཱ་ནཱཾ་ནིཪྻུ་
ཏ་ཡཱ་མི། སརྦ་ཏ་ཐཱ་ག་ཏཱ་ཝཱི་ར་ཡོ་གེ་ནཱི་ཌཱ་ཀི་ནཱི་ཨ་དྷི་ཏིཥྛ་མཱཾ། ཞེས་ཕྱག་བྱས་པས་མཁའ་འགྲོ་མ་མར་མེ་གཅིག་ལས་གཉིས་ཆད་ཀྱི་ཚུལ་གྱིས་བྱུང་ནས། སྙིང་གར་
ཐིམ་པས་རང་མཁའ་འགྲོ་མར་གྱུར་པར་བསམ། དེ་བཞིན་དུ་གཞན་ལྷ་མོ་གསུམ་ལའང་འགྲེའོ། །བྱང་སྒོར་ཐལ་མོ་དཔྲལ་བར་སྦྱར་ཏེ། ཨོཾ་སརྦྦ་ཝཱི་ར་ཡོ་གི་ནཱི་བྷྱཿཔཱུ་ཛ་ཨ་བྷི་ཥེ་ཀཱ་ཡ་ཨཱཏྨཱ་ནཱཾ་ནིཪྻུ་ཏ་ཡཱ་མི། 
15-225
སརྦ་ཏ་ཐཱ་ག་ཏ་ཝཱི་ར་ཡོ་གི་ནཱི་ལཱ་མ་ཨ་བྷི་ཥིཉྩ་ཏུ་མཾ། ནུབ་སྒོར་ཐལ་མོ་ལྐོག་མར་སྦྱར་ཏེ། ཨོཾ་སརྦ་ཝཱི་ར་ཡོ་གི་ནཱི་བྷྱཿཔཱུ་ཛ་པྲ་ཝརྟ་ནཱ་ཡ་ཨཱཏྨཱ་ནཱཾ་
ནིཪྻུ་ཏ་ཡཱ་མི། སརྦ་ཏ་ཐཱ་ག་ཏ་ཝཱི་ར་ཡོ་གི་ནཱི་ཁཎྜ་རོ་ཧེ་ད་པྲ་ཝརྟ་ཡནྟུ་མཱཾ། ལྷོ་ནས་ཐལ་མོ་སྤྱི་བོར་སྦྱར་ལ། ཨོཾ་སརྦ་ཝཱི་ར་ཡོ་གི་ནཱི་བྷྱཿཔཱུ་ཛ་ཀརྨྨ་
ཎེ་ཨཱཏྨཱ་ནཱཾ་ནིཪྻུ་ཏ་ཡཱ་མི། སརྦྦ་ཏ་ཐཱ་ག་ཏ་ཝཱི་ར་ཡོ་གི་ནཱི་རཱུ་པི་ནཱི་ཀརྨ་ཀཪྻནྟུ་མཱཾ། ཞེས་པས་ཕྱག་བྱེད་དུ་གཞུག །དེ་ནས། དེ་བཞིན་གཤེགས་པ་ཀུན་གྱིས་གནས། ལྷ་མོ་
རྣམས་ཀྱི་ཆོས་འབྱུང་ཉིད། །བདེ་ཆེན་སྣ་ཚོགས་ཁང་བརྩེགས་མ། །ཧེ་རུ་ཀ་དཔལ་དཀྱིལ་འཁོར་མཆོག །སྙིང་པོའི་དཀྱིལ་འཁོར་འདི་ཉིད་དུ། །བདག་གིས་སློབ་མ་གཞུག་པར་བགྱི། །ལྷ་ཡི་རིགས་ཀྱི་རིམ་པ་དག།
ཅེས་པ་ནས། དཀྱིལ་འཁོར་འདི་ནི་དེ་བཞིན་ཤོག། ཅེས་གསོལ་བ་བཏབ་ནས་བར་སྣང་གི་ཁ་དོག་ཕྲིན་ལས་བཞིའི་དངོས་གྲུབ་འདི་འགྲུབ། ཅེས་བརྗོད་དོ། །དེ་ནས་སྔགས་ཀྱི་མེ་ཏོག་གི་འཕྲེང་བ་ཏྲཱཾ་
གིས་བྱིན་གྱིས་བརླབས་པ་སྦྱིན་ནས། རྡོ་རྗེ་ཤུགས་ཀྱི་འཇུག་པས་ཞུགས་ཏེ། པྲ་ཏཱིཙྪ་བཛྲ་ཧོཿཞེས་པས་བལྟོས་མེད་དུ་དོར། མེ་ཏོག་ལྷུང་བའི་རྗེས་སུ་འབྲངས་ལ་ལྷ་ངོ་བསྟན་ནོ། །མེ་ཏོག་འཕྲེང་བ་མགོ་བོར་བཞག་ལ། 
15-226
ཨོཾ་པྲ་ཏི་གྲྀ་སྟྭཾ་ཨི་མཾ་ས་ཏྭ་མ་ཧཱ་བ་ལ། འཕྲེང་བའི་དབང་སྦྱིན་ནོ།། དེ་ནས་སློབ་མའི་མིག་གཉིས་སུ་ཉི་མ་ལ་ཧཱུྃ། དཔྲལ་བར་རྃ་བཀོད་ལ། ཨོཾ་ཧེ་རུ་ཀ་དཔལ་དེང་
ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་ཏེ། །རྡོ་རྗེའི་མིག་ནི་བླ་ན་མེད། །ཨོཾ་ཛྙཱ་ན་ཙཀྵུ་བཛྲ་ཧཱུྃ་སྭཱ་ཧཱ།། ཞེས་བརྗོད་པས་མིག་དབྱེ་ནས།། དཀྱིལ་འཁོར་བཟང་
པོ་འདི་ལ་ལྟོས།། ཞེས་པ་ནས། དམ་ཚིག་ཐམས་ཅད་བསྐྱང་བ་དང་། །སྔགས་ཀྱི་དངོས་གྲུབ་བརྩོན་པར་གྱིས།། ཞེས་བརྗོད་ལ་རྟེན་དང་བརྟེན་པར་བཅས་པའི་དཀྱིལ་འཁོར་བསྟན་ཅིང་།། དེའི་ནང་ནས་ཁྱོད་ཀྱིས་ལྷ་
འདི་ལ་མེ་ཏོག་ཕོག་པས། །དེ་ཡི་རིགས་ཡིན་ནོ།། ཞེས་པ་སྟེ་དཀྱིལ་འཁོར་དུ་འཇུག་པའི་རིམ་པའོ།། །།
༄། །དབང་བསྐུར་ལ། རྡོ་རྗེ་སློབ་མའི་དབང་བསྐུར།
དེ་ནས་མཎྜལ་ཕུལ་ནས། ཇི་ལྟར་སངས་རྒྱས་མཁས་རྣམས་ཀྱིས། །རྡོ་རྗེ་སེམས་དཔའ་དབང་བསྐུར་ལྟར། །
བདག་ཀྱང་མགོན་པོས་དབང་བསྐུར་ཞིང་། །མཆོག་ཀྱང་བདག་ལ་སྩལ་དུ་གསོལ།། ཞེས་གསོལ་བ་བཏབ་ལ། དེ་ནས་སློབ་དཔོན་གྱིས་རང་དང་སློབ་མ་དབང་རྫས་གསུམ་ཀ་མི་དམིགས་པ་བསྒོམ་དགོས་ལ། སློབ་མས་
རང་ལྷར་བསྒོམ་པས་ཆོག །བླ་མས་ལས་ཐམས་ཅད་པ་བཟླས་པའི་ཆུས། སློབ་བུ་དང་བུམ་ཆུ་བསངས་སྦྱངས། ཤཱུ་ནྱ་ཏཱས་སྟོང་པར་བསྒོམ། སྟོང་པའི་ངང་ལས་པྃ་ལས་པདྨ། རྃ་ལས་ཉི་མའི་སྟེང་དུ་ཧཱུྃ་དང་རྡོ་རྗེ་ལས་སྐྱེས་པའི་ཐུགས་ཀྱི་འཁོར་ལོ་བདེ་མཆོག་སྐུ་མདོག་སྔོན་པོ་ཕྱག་གཡས་རྡོ་རྗེ་བསྒྱིངས་པ་དང་བཅས་པས་ཐུགས་ཁར་གཏོད་པ་གཡོན་དྲིལ་བུ་སྙེམས་པ་དང་བཅས་པས་དཀུར་འཛིན་པ་ལ་རང་འདྲའི་ཤེས་རབ་མས་འཁྱུད་པར་བསྐྱེད། 
15-227
ཐུགས་ཀ་ནས་འོད་ཟེར་འཕྲོས། ཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོཿ བསྟིམ། ཡང་དབང་ལྷ་སྤྱན་དྲངས། སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། ཞེས་གསོལ་བ་བཏབ་ཡུམ་རྣམས་ཀྱིས་བུམ་ཆུ་མི་
བསྐྱོད་པར་བསྐྱེད་པ་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་དབང་བསྐུར། རིགས་བདག་གིས་དབུ་བརྒྱན་པ་ལ་མཆོད། སྙོམས་པར་ཞུགས་པས་བྱང་སེམས་ཀྱི་
རང་བཞིན་དུ་ཞུ་བའི་བུམ་ཆུར་བལྟའོ། །དེ་ནས་རང་གི་སྙིང་ག་ནས་འོད་ཟེར་འཕྲོས། གཤེགས་པ་གཤེགས་མ། སེམས་དཔའ་སེམས་མ། །ཁྲོ་བོ་ཁྲོ་མོ་སྤྱན་དྲངས་སློབ་མ་ལ་དབང་བསྐུར་པའི་དོན་དུ།
རྡོ་རྗེ་ཅན་གྱིས་འགྲོ་སྐྱབས་ཕྱིར། །སངས་རྒྱས་རྣམས་ཀྱིས་དབང་བསྐུར་བ། །ཡོན་ཏན་འབྱུང་གནས་ཇི་ལྟར་སྩལ། །དེ་བཞིན་འདི་ལའང་སྩལ་དུ་གསོལ།། ཞེས་གསོལ་བ་བཏབ་པས། དེ་བཞིན་གཤེགས་པས་དབང་བསྐུར་བའི་
དགོངས་པ་མཛད། །ཡུམ་བཞི་ཕག་མོ་དང་ལྔས་མེ་ཏོག་དང་གུར་ཀུམ་སོགས་ཀྱི་ཆར་འབེབས་བཞིན་པས་བུམ་པའི་ཆུས་ཁྲུས་གསོལ། སེམས་དཔས་བཀྲ་ཤིས་བརྗོད་པར་བསམ་ལ། སློབ་དཔོན་གྱིས་བརྗོད་ལྷ་མོ་རྣམས་
ཀྱིས་མཆོད་པར་བསམ་ལ། ལས་ཀྱི་རྡོ་རྗེས་མཆོད། དེ་རྣམས་དབང་རྫས་སོ་སོའི་ཏིང་ངེ་འཛིན་མ་གཏོགས་འོག་མ་ཀུན་ལ་འགྲེའོ། ། སློབ་དཔོན་གྱིས་རྡོར་དྲིལ་དང་རྣམ་རྒྱལ་བུམ་པ་འཛིན་པས། བཀྲ་ཤིས་གང་ཞིག་ཆོས་ཀྱི་དབྱིངས་ལས་ངེས་འབྱུང་བ།། 
15-228
ཞེས་སོགས་བཀྲ་ཤིས་ཀྱི་ཚིག་བརྗོད་པའི་རྗེས་སུ། དབང་བསྐུར་རྡོ་རྗེ་ཆེན་པོ་ནི།། ཞེས་པ་ནས། གནས་ལས་བྱུང་བ་སྦྱིན་པར་བྱ། །ཨོཾ་པཉྩ་ཌཱ་ཀི་ནཱི་ཝཱི་ར་སྟྭཾ་ཨ་བྷི་ཥིཉྩ་མི། ཞེས་
དང་། ལྷ་གཞན་རྣམས་ཀྱིས་བརྗོད་ཅིང་། མཇུག་ཏུ་ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་སྟཱཾ་ཨ་ཧཾ། ཞེས་བརྗོད་ཅིང་དབང་བསྐུར། ལུས་ཡེ་ཤེས་ཀྱི་ཆུས་གང་། སྒོ་གསུམ་གྱི་དྲི་མ་
དག །ཆུ་ལྷག་མ་ཡར་ལུད་པས་རིགས་བདག་གིས་དབུ་རྒྱན། དབང་བསྐུར་མཁན་གྱི་ལྷ་ཐམས་ཅད་མི་བསྐྱོད་པའི་རྣམ་པས་སློབ་བུའི་ལུས་ལ་ཐིམ་པ་ལ་མཆོད་པས་མཆོད། ཆུའི་དབང་ཐོབ། ཞེ་སྡང་གི་
དྲི་མ་སྦྱངས། རྣམ་ཤེས་ཀྱི་ཕུང་པོ་གནས་གྱུར། ཆོས་དབྱིངས་ཡེ་ཤེས་མངོན་དུ་བྱས། མི་བསྐྱོད་པའི་ས་བོན་དང་བག་ཆགས་བཞག །མི་བསྐྱོད་པ་ལ་བརྟེན་པའི་དངོས་གྲུབ་དང་འཕྲིན་ལས་བསྒྲུབ་པ་ལ་
དབང་པོ། དེས་དག་པ་སྦྱིན་ནོ།། དེ་ལྟར་སློབ་བུ་དང་དབུ་རྒྱན་བསངས་སྦྱངས། ཏྲཱཾ་དང་རིན་པོ་ཆེ་ལས་སྐྱེས་པའི་ཡེ་ཤེས་འཁོར་ལོ་བདེ་མཆོག་གཡས་རིན་པོ་ཆེ་བསྒྱིངས་པ་དང་བཅས་པས་དཀུར་
འཛིན། གཡོན་དྲིལ་བུ་ཐུགས་ཁར་ཕྱོགས་པ་ལ། རང་འདྲའི་ཤེས་རབ་མས་འཁྱུད། སྔར་བཞིན་ཞུ་བ་ལས་བྱུང་བའི་དབུ་རྒྱན་དུ་གྱུར། རིན་ཆེན་ཅན་གྱིས་འགྲོ་སྐྱབས་ཕྱིར། ཞེས་སོགས་དང་། དབང་བསྐུར་རྡོ་རྗེ་ཆེན་པོ་ནི། 
15-229
ཞེས་པའི་རྗེས་ལ། ཡོན་ཏན་དཔག་མེད་འབྱུང་བའི་གནས། ཡིད་བཞིན་རིན་ཆེན་སྣ་ཚོགས་རྒྱལ། །ངོ་མཚར་གཟི་བརྗིད་ཆེན་པོའི་མཆོག །ཅོད་པན་གྱི་ནི་དབང་བསྐུར་རོ། །ཨོཾ་ཨཱཿབཛྲ་མུ་ཀུ་ཊ་ཨ་བྷིཥིཉྩ་ཧཱུྃ།
སུ་ར་ཏསྟཱཾ་ཨ་ཧཾ། ཞེས་བརྗོད་ཅིང་ཆུས་ཀྱང་དབང་བསྐུར། རིགས་བདག་གིས་དབུ་བརྒྱན། དབང་གི་ལྷ་རྣམས་རིན་འབྱུང་གི་རྣམ་པས་ཐིམ། དེ་ལ་མཆོད། དབུ་རྒྱན་གྱི་དབང་ཐོབ། ང་རྒྱལ་དང་སེར་སྣ་
དག །ཚོར་བའི་ཕུང་པོ་གནས་གྱུར། མཉམ་ཉིད་ཡེ་ཤེས་མངོན་དུ་བྱས། རིན་འབྱུང་ག་ིས་བོན་དང་བག་ཆགས་བཞག །དེ་ལ་བརྟེན་པའི་དངོས་གྲུབ་དང་འཕྲིན་ལས་བསྒྲུབ་པ་ལ་དབང་ངོ་།། རྡོ་རྗེ་དང་
སློབ་མ་བསངས་སྦྱངས། ཨོཾ་དང་པདྨ་ཡོངས་སུ་གྱུར་པ་ལས། གསུང་གི་འཁོར་ལོ་བདེ་མཆོག་སྐུ་མདོག་དམར་པོ། གཡས་པདྨ་དམར་པོ་བསྒྱིངས་པ་དང་། གཡོན་དྲིལ་བུ། ཞུ་བ་ལས་བྱུང་བའི་རྡོ་རྗེ། པདྨ་
ཅན་གྱིས་འགྲོ་སྐྱབས་ཕྱིར།། སོགས་དང་། དབང་བསྐུར་རྡོ་རྗེ་སོགས་དང་། སངས་རྒྱས་རྡོ་རྗེའི་དབང་བསྐུར་བས། །དེ་ནི་ཁྱོད་ཉིད་དབང་བསྐུར་བྱ། །འདི་སྟེ་སངས་རྒྱས་ཐམས་ཅད་ཉིད། །རྡོ་རྗེ་འགྲུབ་ཕྱིར་རྡོ་རྗེ་
ལོང་། །བཛྲ་ཨ་བྷི་ཥིཉྩ། ཞེས་བརྗོད། སྙིང་མགྲིན་དཔྲལ་བར་གཏུགས། ལག་གཡས་སུ་སྦྱིན། ཆུས་ཀྱང་དབང་བསྐུར། རིགས་བདག་གིས་དབུ་བརྒྱན། འོད་དཔག་མེད་ཀྱི་རྣམ་པ་ལུས་ལ་ཐིམ་པ་ལ་མཆོད། འོད་དཔག་མེད་རྡོ་རྗེའི་དབང་ཐོབ། 
15-230
འདོད་ཆགས་ཀྱི་དྲི་མ་དག །འདུ་ཤེས་ཀྱི་ཕུང་པོ་གནས་གྱུར། སོར་རྟོགས་ཡེ་ཤེས་མངོན་དུ་བྱས། འོད་དཔག་མེད་ཀྱི། དེ་ལ་བརྟེན་པའི་སོགས་བརྗོད་དོ། ། དེ་ནས་སློབ་མ་དང་དྲིལ་བུ་བསངས་སྦྱངས།
ཁཾ་དང་སྣ་ཚོགས་རྡོ་རྗེ་སྐྱེས་པའི་དམ་ཚིག་འཁོར་ལོ་བདེ་མཆོག་སྐུ་མདོག་ལྗང་ཁུ་གཡས་སྣ་ཚོགས་རྡོ་རྗེ་བསྒྱིངས་པ་དང་། གཡོན་དྲིལ་བུ། ཞུ་བའི་དྲིལ་བུར་གྱུར། སྣ་ཚོགས་ཅན་གྱིས་འགྲོ་སྐྱབས་
ཕྱིར།། སོགས་དང་། དབང་བསྐུར་སོགས་དང་། ཨོཾ་དྲིལ་བུ་རྡོ་རྗེ་རབ་ལྡན་པ། ཤིན་ཏུ་དཔའ་བོ་ཉིད་དབང་བསྐུར། །རྡོ་རྗེ་དམ་ཚིག་གནས་པ་ཁྱོད། །བདག་པོའི་དབང་བསྐུར་རྒྱལ་མནོས་ཤིག །ཨོཾ་བཛྲ་གྷཎྜེ་ཨཿཨཿབཅོམ་
ལྡན་གཟུང་ངོ་བདག་ལ་ནི། །ཡང་དག་ཉེ་བར་གྱུར་པར་མཛོད།། ཅེས་བརྗོད་དུ་གཞུག །ཆུ་དབང་། རིགས་བདག་གིས་དབུ་བརྒྱན། ལྷ་ཐམས་ཅད་དོན་གྲུབ་ཀྱི་རྣམ་པས། དྲིལ་བུའི་དབང་ཐོབ། ཕྲག་དོག་གི་དྲི་
མ་དག །འདུ་བྱེད་ཀྱི་ཕུང་པོ་གནས་གྱུར། བྱ་གྲུབ་ཡེ་ཤེས་མངོན་དུ་བྱས།། དོན་གྲུབ་ཀྱི་ས་བོན། དེ་ལ་བརྟེན་པའི་སོགས་བརྗོད། དེ་ནས་སློབ་མ་བསངས་སྦྱངས།། ཨོཾ་དང་འཁོར་ལོ་ལས་སྐྱེས་པའི་
སྐུའི་འཁོར་ལོ་བདེ་མཆོག་དཀར་པོ་གཡས་འཁོར་ལོ། གཡོན་དྲིལ་བུ་བསྒྱིངས་པ་དང་བཅས་པ་དཀུར་འཛིན། རང་འདྲའི་ཤེས་རབ་མས་འཁྱུད་པ། འཁོར་ལོ་ཅན་གྱིས་འགྲོ་སྐྱབས་ཕྱིར།། དང་། དབང་བསྐུར་སོགས་དང་། ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི། 
15-231
ཧེ་རུ་ཀ་ནཱ་མ་ཨ་བྷི་ཥེ་ཀ་ཏཿཀྱེ་དཔལ་ཆེ་གེ་མོ་རྡོ་རྗེ་ཞེས་མིང་བཏགས། ཆུས་དབང་བསྐུར། རིགས་བདག་གིས་དབུ་བརྒྱན། དབང་ལྷ་ཐམས་ཅད་རྣམ་སྣང་གི་རྣམ་པས་སློབ་མའི་ལུས་ལ་
ཐིམ། ལུས་ངག་ཡིད་གསུམ་རྣམ་སྣང་གི་རང་བཞིན་དུ་གྱུར་པ་ལ་མཆོད། མིང་དབང་ཐོབ། གཏི་མུག་སྦྱངས། གཟུགས་ཕུང་གནས་གྱུར། མེ་ལོང་ཡེ་ཤེས་མངོན་དུ་བྱས། རྣམ་སྣང་གི་བག་ཆགས་བཞག །དེ་ལ་
བརྟེན་པའི་དངོས་གྲུབ་དང་འཕྲིན་ལས་བསྒྲུབ་པ་ལ་དབང་ངོ་།། ཞེས་དག་པ་སྦྱིན། རྡོ་རྗེ་སློབ་མའི་དབང་བསྐུར་རོ།། །།
༄། །རྡོ་རྗེ་སློབ་དཔོན་དབང་བསྐུར་ལ། བུམ་དབང་།
དེ་ནས་སློབ་དཔོན་གྱི་དབང་གི་དོན་དུ་མཎྜལ་ཕུལ་ནས། ཀྱེ་ཧོ་སྙིང་རྗེའི་གཏེར་
བདག་ལ། །ཁྱེད་ཀྱི་བཀའ་དྲིན་གང་གི་བདག །བདག་དང་གཞན་ནུས་འགྱུར་བ་ཡིས། །རྡོ་རྗེ་སློབ་དཔོན་དབང་བསྐུར་གསོལ།། ཞེས་གསོལ་བ་བཏབ། ལྷོ་སྒོར་རིན་པོ་ཆེས་སྤྲས་པའི་ཁྲིའི་སྟེང་དུ་སྣ་ཚོགས་པདྨའི་
ཤར་འདབ་ལ་འཁོར་ལོ། ལྷོར་རིན་ཆེན། ནུབ་ཏུ་པདྨ། བྱང་དུ་རལ་གྲི་བྲིས་པའི་དབུས་སུ་ཕྱག་རྒྱ་ལྔས་བརྒྱན། མཆན་ཁུང་དུ་ཁ་ཊྭཱཾ་ག་ཐོགས་པའི་སློབ་མ་བཞག །སྟེང་དུ་བླ་རེ་དང་། གཡས་
གཡོན་དུ་གདུགས་རྒྱལ་མཚན། མཆོད་རྫས་རྣམས་བཀོད་དེ། སློབ་མ་བསངས་སྦྱངས། ཧཱུྃ་དང་རྡོ་རྗེ་ལས་གཙོ་བོར་བསྐྱེད། ཡེ་ཤེས་པ་གཞུག །དབང་བསྐུར་སོགས་སྔར་བཞིན་བྱས། བདེ་གཤེགས་ཅན་གྱིས་འགྲོ་སྐྱབས་ཕྱིར། སོགས་དང་། 
15-232
དབང་བསྐུར། སོགས་དང་། ཆུ་དབང་རིགས་བདག་གིས་དབུ་བརྒྱན། དབང་ལྷ་ཐམས་ཅད་ཡེ་ཤེས་པའི་ངོ་བོར་ཐིམ་པར་གྱུར་ཏེ། ཨོཾ་སུ་པྲ་ཏིཥྛ་བཛྭེ་སྭཱ་ཧཱ། ཞེས་མེ་ཏོག་གཏོར་ལ་བྱིན་གྱིས་བརླབ་བོ། །
དེ་ནས་དམ་ཚིག་གསུམ་སྦྱིན་པའི་དོན་དུ། རྡོ་རྗེ་བསངས་སྦྱངས། ཧཱུྃ་དང་རྡོ་རྗེ་ལས་སྐྱེས་པའི་རྡོ་རྗེ་སེམས་དཔར་བསྐྱེད་པ་སོགས་བྱས་ལ། ཞུ་བ་ལས་བྱུང་བའི་རྡོ་རྗེ། ཐོག་མཐའ་མེད་པའི་
སེམས་དཔའ་ནི།། ཞེས་པ་ནས། བདག་པོའི་བདག། ཞེས་པའི་བར་བརྗོད། བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ། །ཨོཾ་མ་ཧཱ་བཛྲ་ཧཱུྃ། ཞེས་སློབ་མས་ཀྱང་རྗེས་ཟློས་བྱེད་དོ། །དྲིལ་བུ་བསངས་སྦྱངས། ཨཱཿལས་
རྡོ་རྗེ་སྙེམས་མར་བསྐྱེད། ཞུ་བའི་དྲིལ་བུ། འདི་ནི་རྣལ་འབྱོར་མ་ཀུན་གྱི། །བྱང་ཆུབ་མཆོག་ཏུ་རྒྱལ་བ་བཞེད།། ཅེས་བརྗོད། ལག་པ་གཡོན་དུ་སྦྱིན། སློབ་མས་ཀྱང་། ཨོཾ་བཛྲ་གྷཎྜེ་ཨཿཨཿཅེས་བརྗོད། ཡིད་ཀྱི་
ལུས་སུ་བརྟན་བྱེད་པ། དམ་ཚིག་ཕྱག་རྒྱར་གྲགས་པ་ཡིས། །སྐུར་ནི་ཉེ་བར་གནས་གྱིས་ལ། །ཕྱག་རྒྱ་རྟག་ཏུ་བརྟན་པར་གྱིས། །ཡེ་ཤེས་ཕྱག་རྒྱར་བྱིན་བརླབས་ནི། །འདོད་པ་ཐམས་ཅད་ལོངས་སྤྱོད་དེ། །
དངོས་གྲུབ་ཐམས་ཅད་སྒྲུབ་པར་གྱིས།། ཞེས་བརྗོད་ལ་འཁྱུད་ཚུལ་བྱེད་དུ་གཞུག་གོ །དེ་ལ་ཉེར་སྤྱོད་ཀྱིས་མཆོད།། མི་བསྐྱོད་རྡོ་རྗེ་ཞེས་སོགས་ཀྱིས་བསྟོད་ལ། དེ་ཉིད་སྟོན་པ་ལ། དཀྱིལ་འཁོར་གྱི་དེ་ཉིད་ནི། 
15-233
ཐམས་ཅད་དངོས་པོ་གཅིག་ཉིད་དུ། །སྤྲུལ་སྐུའི་མཛད་པ་རྫོགས་གྱུར་པ། །དུར་ཁྲོད་ཡིན་ཏེ་ལུས་སུ་དག །ཡེ་ཤེས་སྣང་བ་ཀུན་ཁྱབ་ཅིང་། །བདུད་བཅོམ་འོད་དང་རྡོ་རྗེ་ཅན། །མི་མཉམ་མེད་པས་ཟུར་
བཞི་པ། །འཕགས་པའི་བདེན་པ་དངོས་གཞི་ཉིད། །དྲན་དང་དབང་པོ་ངོས་བཞི་སྟེ། །བསམ་གཏན་རྣམས་ཀྱི་རྟ་བབས་ཉིད། །ཚོན་སྣ་ལྔ་པོ་སངས་རྒྱས་ཏེ། །དགེ་བའི་སྤྱོད་པ་ཤཱིརྵ་ཀ །གྲྭ་ཚོགས་བྱང་ཆུབ་
ཡན་ལག་བདུན། །བ་དན་དྲིལ་བུ་གསུང་རབ་སྒྲ། །ཏིང་ངེ་འཛིན་གྱི་ཁ་ཁྱེར་ཏེ། །གཟུངས་ནི་འདོད་པའི་ལྷ་མོའོ། །པདྨ་འདམ་གྱིས་མ་གོས་ཏེ། རྣམ་ཐར་བརྒྱད་ཀྱི་ཀ་བ་ཉིད། །སྣ་ཚོགས་ཆོས་འཁོར་
རྒྱལ་པོའི་གནས། །འཁོར་ལོ་གདུགས་ཀྱིས་རྣམ་པར་མཛེས། །ཆོས་ཀྱི་དབྱིངས་སུ་རོ་གཅིག་ཕྱིར། །རྩེ་མོ་རྡོ་རྗེས་བརྒྱན་པ་ཉིད།། ཅེས་དང་ལྷའི་དེ་ཉིད། ལུས་དྲན་པ་ཉེ་བར་བཞག་པ་སོགས་དང་། སློབ་དཔོན་
གྱིས་དེ་ཉིད་ཀྱང་བརྗོད་དོ། །དེ་ནས་སློབ་མའི་མིག་ཏུ་པྲཾ་ལས་མི་ཤེས་པའི་རབ་རིབ་འདུས་པར་བསམས་ལ། །པྲ་ལས་སྐྱེས་པའི་གསེར་གྱི་ཐུར་མ་མར་དང་སྦྲང་རྩི་འདུས་པའི་མིག་སྨན་ལ་
སྨྱུགས་ཏེ། །ཇི་ལྟར་མིག་མཁན་རྒྱལ་པོ་ཡིས།། ཞེས་ནས། པ་ཏྲ་ལཾ་སྲིཿཞེས་བརྗོད་པས། རབ་རིབ་བསལ། ཡེ་ཤེས་ཀྱི་སྤྱན་དབྱེ་བར་བསམ། དེ་ནས་ཨཱཿལས་སྐྱེས་པའི་མེ་ལོང་ཨཱཿཡིས་བསྡགས་ལ་བསྟན་ཏེ། ཆོས་རྣམས་གཟུགས་བརྙན་ལྟ་བུ་ཉིད།། 
15-234
ཅེས་པ་ནས། འོན་ཀྱང་སངས་རྒྱས་སྲས་སུ་སྐྱེད།། ཞེས་བརྗོད་ལ་ཆོས་ཀྱི་མཚན་ཉིད་བསྟན་ནོ། །ཨཱཿལས་སྐྱེས་པའི་དྲིལ་བུ་ཨཱཿབཟླས་པས་དཀྲོལ་དུ་གཞུག །ཐམས་ཅད་ནམ་མཁའི་མཚན་ཉིད་ཏེ།། ཞེས་སོགས་བརྗོད་ལ།
སྒྲ་ཐམས་ཅད་ནམ་མཁའ་ལྟར་ཤེས་པར་གྱིས་ཤིག །ཧོཿལས་སྐྱེས་པའི་མདའ་གཞུ་ལ་ཧོཿབརྗོད་དེ། ཆོས་ཉིད་གཞུ་ཡི་ཡེ་ཤེས་མདའ། །ཕྱོགས་མཚམས་སྟེང་འོག་ཀུན་ཏུ་འཕོངས། །བདུད་སོགས་བཅོམ་པས་དེ་བཞིན་གཤེགས། །ཐམས་
ཅད་རྗེས་སུ་མཉེས་པར་གྱིས།། ཞེས་པས་ཕྱོགས་བཞི་སྟེང་འོག་ཏུ་མདའ་འཕེན་པའི་ཚུལ་བྱེད་གཞུག་གོ། དེ་ནས་ཨོཾ་བཛྲ་ཧེ་ཏུ་མཱཾ་གྱིས་འཁོར་ལོ་རྐང་པའི་བར་དུ་བཞག །ཨོཾ་བཛྲ་བྷཱ་ཥ་རྃ་
གྱིས་དུང་ལག་པ་གཡས་སུ་སྦྱིན། དྲིལ་བུ་དང་པོ་ཏི་གཡོན་དུ་གཏད་ནས་ཀློག་ཏུ་གཞུག །དེང་ནས་བརྩམས་ཏེ་སེམས་བསྐྱེད་པ། །ཞེས་ནས། ཁྱོད་ལ་རྟག་ཏུ་སྲུང་བར་བྱེད།། ཅེས་དང་། དེ་རིང་རྡོ་
རྗེ་སློབ་དཔོན་འགྱུར། །སྔགས་དང་རྒྱུད་ནི་འཛིན་གྱུར་པས། །སངས་རྒྱས་བྱང་ཆུབ་སེམས་རྣམས་དང་། །ལྷ་རྣམས་ཀྱིས་ཀྱང་མཐུན་པར་གསུངས། །སེམས་ཅན་ཀུན་ལ་རྗེས་བརྩེ་བས། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་
ཏན་བསྐྱེད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱོར། །ཞེས་བརྗོད། དེ་ནས་རིགས་ལྔའི་ཕྱག་མཚན་བསངས་སྦྱངས་རིགས་ལྔར་བསྐྱེད། ཞུ་བ་ལས་བྱུང་བའི་ཕྱག་མཚན་སློབ་མ་རྣམ་སྣང་དུ་བསྐྱེད་པའི་ལག་ཏུ་འཁོར་ལོ་གཏད། །
15-235
སེམས་ཅན་ཀུན་ལ་ཕན་པའི་ཕྱིར། །འཇིག་རྟེན་ཁམས་ནི་ཐམས་ཅད་དུ། །ཇི་ལྟར་སྣ་ཚོགས་འདུལ་གྱུར་པའི། །ཆོས་ཀྱི་འཁོར་ལོ་རབ་ཏུ་བསྐོར། སློབ་མ་མི་བསྐྱོད་པར་བསྐྱེད་པ་ལ་རྡོ་རྗེ་གཏད། ཆོས་
ཀྱི་འཁོར་ལོའི་གནས་སུ། རྡོ་རྗེའི་འཁོར་ལོ་དང་། རིན་ཆེན། པདྨ་ལས་ཀྱི་འཁོར་ལོ་སོགས་བརྗོད་ལ་དཀྱིལ་འཁོར་བྲི་བའི་རྗེས་གནང་སྦྱིན་ནོ། །ཞི་རྒྱས་དབང་དང་དགུག་པ་དང་། །སྔང་བར་བྱེད་དང་རེངས་
སོགས་དང་། །བསད་དང་བསྐྲད་པ་ཐམས་ཅད་དང་། །ལས་དེ་རྣམས་ནི་སྒྲུབ་པར་གྱིས།། ཞེས་འཕྲིན་ལས་བསྒྲུབ་པའི་རྗེས་གནང་དང་། རལ་གྲི་མིག་སྨན་ས་འོག་དང་། །རྐང་མགྱོགས་བཅུད་ལེན་མཁའ་ལ་འགྲོ། །མི་སྣང་
ལ་སོགས་གྲུབ་པའི་ཚོགས། །ཅི་དགའ་བར་ནི་སྒྲུབ་པར་གྱིས།། ཞེས་དངོས་གྲུབ་སྒྲུབ་པའི་རྗེས་གནང་སྦྱིན། །དེ་ནས་བླ་མའི་ཞབས་ལ་ཕྱག་བྱས། གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་ནི་བགྱིད་
པར་འཚལ།། ཞེས་ཁས་བླང་ངོ་། །སློབ་མ་དང་རྡོ་རྗེ་བསངས་སྦྱངས། ཧཱུྃ་ལས་རྡོ་རྗེ་སེམས་དཔར་བསྐྱེད་དེ་ཞུ་བ་ལས་བྱུང་བའི་རྡོ་རྗེ། འདི་སྟེ་སངས་རྒྱས་ཐམས་ཅད་ཀྱི། །རྡོ་རྗེ་སེམས་དཔའི་ཕྱག་
ན་གནས། །ཁྱོད་ཀྱིས་ཀྱང་ནི་རྟག་ཏུ་གཟུང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་ས་མ་ཡ་ཏིཥྛཿསྟྭཾ་དྷཱ་ར་ཡཱ་མི་ཧཱིཿཧི་ཧི་ཧི་ཧི་ཧཱུྃ་ཧཱུྃ། ཞེས་བརྗོད་ལ་རྡོ་རྗེ་གཏད། 
15-236
སློབ་མས་ཀྱང་སྔགས་དེ་བརྗོད་པ་ནི་རྡོ་རྗེའི་བརྟུལ་ཞུགས་སོ། །ཁ་ཊྭཱཾ་ག་བསངས་སྦྱངས་གཙོ་བོ་ཡབ་ཡུམ་དུ་བསྐྱེད། ཞུ་བའི་ཁ་ཊྭཱཾ་ག་གཡོན་གྱི་གྲུ་ཁུགས་སུ་སྦྱིན། ལག་པ་གཡས་སུ་ཌཱ་
མ་རུ། གཡོན་དུ་ཐོད་པ་བདུད་རྩིས་གང་བ། །ཕྲག་པར་ཚངས་སྐུད་བྱིན་ལ། ཁ་ཊྭཱཾ་ག་དང་ཌཱ་མ་རུ། ཞེས་པ་ནས། དཔའ་བོ་ཆེན་པོ་བླང་བར་གྱིས། ཞེས་དང་། གཙོ་བོའི་སྙིང་པོ་ཚར་
གཅིག་བརྗོད་ནས་བདུད་རྩི་འཐུང་དུ་གཞུག །དེ་ནས་སློབ་མ་རྣམས་ལྷ་མོ་བརྒྱད་ཀྱི་ང་རྒྱལ་འཛིན་བཞིན་པས་ཕྱག་རྒྱ་རེ་རེ་ནས་འཆིང་དུ་བཅུག་སྟེ། དེང་ནས་བརྩམས་ཏེ་རྫོགས་སངས་རྒྱས།། ཞེས་པ་
ནས་གཟུང་། བྱང་ཆུབ་ལུས་ཅན་རྣམས་ལ་བསྒོས།། ཞེས་པའི་བར་བརྗོད། དེ་རྣམས་ལྷ་མཆོད་པའི་རྗེས་གནང་ངོ་། ། དེ་ནས་སློབ་དཔོན་ལག་པ་གཡོན་པས་ཆོས་གོས་ཀྱི་གྲྭ་འཛིན་པས་དྲིལ་བུ་འཆང་། གཡས་སྐྱབས་
སྦྱིན་ནམ་མཆོག་སྦྱིན་གྱིས་རྡོ་རྗེ་བསྡམས་ནས། ཨོཾ་འདིར་ནི་ཁྱོད་ལ་ངས་ལུང་བསྟན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་དཔལ་
ཆེ་གེ་མོ་ཞེས་བྱ་བའི་དེ་བཞིན་གཤེགས་པ་སིདྡྷྱ་ས་མ་ཡསྟྭཾ་བྷུརྦྷ་བཿསྭཿཞེས་ཆེ་གེའི་གནས་སུ་གསང་མཚན་བཅུག་པས་ལུང་བསྟན་ལ། གང་ལ་ཚིག་འདིས་ལུང་བསྟན་པ། །དེ་ལ་སངས་རྒྱས་བྱང་ཆུབ་སེམས། །
15-237
འཁོར་དང་བཅས་པ་མགྲིན་གཅིག་ཏུ། །བྱང་ཆུབ་ཆེན་པོར་ལུང་བསྟན་ཏེ། །ཕྱག་རྒྱ་སྔགས་འདིའི་མཐུ་ཡིན་ཞེས། །སློབ་མ་དད་པ་རབ་ཏུ་བསྐྱེད།། ཅེས་བསྒོ་བར་བྱའོ། །དེ་ནས། འདོད་ཆགས་བྲལ་བ་ལྟ་བུའི་
སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ཀྱི་ནམ་ཡང་མི་བྱའོ། །མ་ཧཱ་ས་མ་ཡ་ཧཱུྃ་ཕཊ྄། ཅེས་གསང་བར་གདམས། གཙོ་བོའི་སྔགས་ཚར་གཅིག་བརྗོད་ནས། བཅོམ་
ལྡན་འདི་ལ་སྦྱིན་ལགས་ཀྱི། །འདི་ལ་ཉེ་བར་མཛད་དུ་གསོལ།། ཞེས་བརྗོད། སློབ་མས། བཅོམ་ལྡན་གཟུང་ངོ་བདག་ལ་ནི། །ཡང་དག་ཉེ་བར་གྱུར་པར་མཛོད།། ཅེས་མེ་ཏོག་འཕྲེང་བ་རང་གི་མགོ་བོར་
བཟུང་ལ། སྔགས་ཚར་གཅིག་བཟླས་པ་ནི་སྔགས་ཀྱི་རྗེས་གནང་ངོ་། ། དེ་ནས་སློབ་མས་གདུགས་བཟུང་སྟེ་དཀྱིལ་འཁོར་ལ་བསྐོར་བ་བྱེད་དུ་བཅུག་ནས། སྔགས་དང་རྒྱུད་རྣམས་འཛིན་གྱུར་པའི། །སློབ་མ་འདི་ནི་
ཕུལ་བ་ལགས།། ཞེས་བརྗོད་ཅིང་། མཆོག་གསང་དཀྱིལ་འཁོར་དམ་པ་འདིར། །ཞུགས་པ་དང་ནི་མཐོང་བ་ཡིས། །སྡིག་པ་ཀུན་ལས་རྣམ་གྲོལ་ནས། །དེ་རིང་ཁྱེད་རྣམས་བདེ་བར་གནས། །བདེ་ཆེན་ཐེག་པ་འདི་ལ་
ནི། །ཕྱིན་ཆད་འཆི་བ་ཡོང་མེད་དེ། །མི་ཐུབ་ཚུགས་པ་ཡོད་མིན་པས། །ཅིས་ཀྱང་མ་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །གང་ཞིག་སྐྱེས་པ་ཙམ་གྱིས་ནི། །
15-238
སངས་རྒྱས་ཉིད་དུ་དགོས་མེད་པའི། །བྱང་ཆུབ་སེམས་ནི་སྤང་མི་བྱ། །དམ་པ་སྨད་པར་མི་བྱ་སྟེ། །ནམ་ཡང་དོར་བར་མི་བྱའོ། །མི་ཤེས་པའམ་རྨོངས་པ་ལ། །གསང་བ་དེ་ཉིད་བསྟན་མི་བྱ། །
རྡོ་རྗེ་དྲིལ་བུ་ཕྱག་རྒྱ་ཡང་། །སངས་རྒྱས་ཀུན་དང་མཚུངས་གྱུར་པའི། །སློབ་དཔོན་སྨད་པར་མི་བྱ་སྟེ། །རང་བདག་ཡོངས་སུ་སྤངས་པ་ཡིས། །དཀའ་ཐུབ་ཀྱིས་ནི་གདུང་མི་བྱ། །ཇི་ལྟར་བདེ་བར་བདེ་
གཟུང་ནས། འདི་ནི་མ་བྱོན་རྫོགས་སངས་རྒྱས།། ཞེས་གཟེངས་བསྟོད་དང་། །དབུགས་དབྱུང་བྱས་ལ། སློབ་མས་ཕྱག་བགྱིད་བཞིན་པས། གཙོ་བོས་ཇི་ལྟར་བཀའ་སྩལ་པ། །དེ་བཞིན་དུ་ནི་བདག་གིས་བགྱིད། ཅེས་ཁས་བླང་
ངོ་། །དེ་ཡང་དཀྱིལ་འཁོར་བཞི་ལས་ཕྱི་རྡུལ་ཚོན་གྱི་དཀྱིལ་འཁོར་དུ་བུམ་པ་ཆུའི་དབང་ཐོབ། སྤང་བྱ་ལུས་ཀྱི་དྲི་མ་དག །ཕུང་ཁམས་སྐྱེ་མཆེད་ལྷའི་རྣམ་པར་གྱུར། །སྤྲུལ་སྐུའི་ནུས་པ་བཞག །བསྐྱེད་
རིམ་བསྒོམ་པ་དང་། དངོས་གྲུབ་བསྒྲུབ་ཅིང་དམ་ཚིག་བསྲུང་བ་ལ་དབང་། སྐུ་རྡོ་རྗེ་མངོན་དུ་འགྱུར་པའི་སྐལ་ལྡན་དུ་བྱས་སོ།། །།
༄། །གསང་དབང་།
དེ་ནས། གསང་དབང་གི་དོན་དུ། རིག་མ་མཚན་ལྡན་དང་མཎྜལ་ཕུལ་
ནས། སྐྱོབ་པ་སྐྱབས་མེད་རྣམས་ཀྱི་སྐྱབས། །འཁོར་ལོ་སྡོམ་པས་སྐྱབས་མཛོད་ཅིག །རྒྱུ་མེད་པར་ནི་ཐུགས་རྗེ་ཆེ། །མགོན་མེད་བདག་གི་མགོན་མཛོད་ཅིག། ཅེས་གསོལ་བ་ལན་གསུམ་བཏབ། སློབ་མ་དང་རིག་མའི་གདོང་རས་ཀྱིས་བཅིངས། 
15-239
ཡོལ་བའི་ནང་དུ་སྐད་ཅིག་གིས་རང་རེ་ཧེ་རུ་ཀ་དང་རིག་མ་ཕག་མོར་བསྐྱེད། །སྐུ་གསུང་ཐུགས་བྱིན་རླབས་དང་གོ་ཆ་བསྐོན། རྡོ་རྗེ་དང་པདྨ་བྱིན་གྱིས་བརླབས་ནས་སྙོམས་འཇུག་བྱ་ཞིང་། ཨོཾ་
སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་འདོན་ཞིང་། ཐུགས་ཁའི་ས་བོན་ལས་འོད་འཕྲོས། །རིགས་ལྔ་ཡབ་ཡུམ་སྤྱན་དྲངས། སྤྱི་བོ་ནས་ཞུགས། ཆགས་པའི་མེས་བྱང་
ཆུབ་ཀྱི་སེམས་ཞུ། སྐུའི་དབྱིབས་བརྒྱུད། རྡོ་རྗེ་ནོར་བུར་ལྷན་ཅིག་སྐྱེས་པའི་བདེ་བ་བརྟན་པར་བྱས་ཏེ། མཐེ་བོང་དང་སྲིན་མཛུབ་ཀྱིས་བཙིར་ནས་པདྨ་ནས་ཕྱུང་བ། སློབ་མ་འོད་དཔག་མེད་དུ་བསྐྱེད་
པའི་ལྕེ་ཐོག་ཏུ། འདས་པའི་རྡོ་རྗེ་འཆང་སོགས་ཀྱིས། །ཇི་ལྟར་སངས་རྒྱས་དབང་བསྐུར། །དེ་བཞིན་དུ་ནི་བྱང་ཆུབ་སེམས། །མཛེས་པས་བུ་ཁྱོད་དབང་བསྐུར་རོ། །ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ྄་ཅེས་བརྗོད་ལ་
སྦྱིན། དེས་ཀྱང་། སངས་རྒྱས་ཐམས་ཅད་འདུས་པའི་བློས། །ཨ་ཧོ་མ་ཧཱ་སུ་ཁཾ། ཞེས་བརྗོད་ལ་བཏུང་ངོ་། །རིག་མས་ཀྱང་གཅེར་བུ་པདྨ་ན་གནས་པའི་བྱང་སེམས། འདི་དེ་དཔའ་བོ་ལྷ་མོ་རྣམས། །དམ་
ཚིག་རྨད་བྱུང་ཆེན་པོ་སྟེ། །ཁམས་ལྔ་ལྡན་པའི་རོ་རྟོགས་བྱེད། །བདེ་བ་དེ་གང་མྱང་བར་བྱ།། ཞེས་བརྗོད་ལ་སྦྱིན། །དེས་ཀྱང་འཐུངས་པས། མགྲིན་པར་རྩ་སྟོང་ཕྲག་བདུན་ཅུ་རྩ་གཉིས་འདུས་པའི་རྩ་འདབ་བཅུ་དྲུག་བྱང་ཆུབ་སེམས་ཀྱིས་གང་། 
15-240
དེ་ནས་བརྒྱུད་ནས་ལུས་ཐམས་ཅད་གང་ནས། །གསལ་སྟོང་བདེ་བས་བརྒྱན་པའི་ཏིང་ངེ་འཛིན་སྐྱེས་པར་བསམས་ལ། ཨོཾ་ཨཱཿཧཱུྃ་ཞེས་པས་མིག་དར་དབྱེ། །དེ་ལྟར་དབང་བཞི་ལས་བྷ་གའི་དཀྱིལ་འཁོར་མཐོང་། གསང་
བའི་དབང་ཐོབ། ངག་གི་དྲི་མ་དག །ལམ་བདག་བྱིན་གྱིས་བརླབ་པ་དང་། དམ་ཚིག་ཤ་ལྔ་བདུད་རྩི་ལྔ་བསྟེན་པ་ལ་དབང་། ལོངས་སྤྱོད་རྫོགས་སྐུའི་ས་བོན་བཞག །གསུང་རྡོ་རྗེ་མངོན་དུ་འགྱུར་བའི་
སྐལ་ལྡན་དུ་བྱས་སོ།། །།
༄། །ཤེས་རབ་ཡེ་ཤེས་ཀྱི་དབང་།
དེ་ལས་ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ་ནས། བྱང་ཆུབ་རྡོ་རྗེས་ལན་གསུམ་གསོལ་བ་བཏབ། སློབ་མ་དང་རིག་མ་མིག་དར་བཅིངས། སློབ་མ་མི་བསྐྱོད་
པར་བསྐྱེད། གོ་བགོ ཡེ་ཤེས་པ་གཞུག །སྐུ་གསུང་ཐུགས་བྱིན་གྱིས་བརླབས་ནས། རིག་མ་གཟུགས་དང་ལང་ཚོར་ལྡན་པ་དེའི་ལག་ཏུ་གཏད་ལ། སངས་རྒྱས་ཐམས་ཅད་དཔང་པོར་བྱས་ཏེ། རིག་མའི་སྤྱི་བོར་
རྡོ་རྗེ་བཞག་ནས། ལྷ་མོ་འདི་ནི་ཕྱག་རྒྱ་ཆེ། །མཐའ་ཡས་བདེ་བ་སྦྱིན་པ་མོ། །རྣམ་པ་ཀུན་ཏུ་ཕྱག་རྒྱ་ཡང་། །བུ་ཡིས་བླ་མེད་མཆོད་པར་གྱིས།། ཞེས་བརྗོད་དེ་ཕྱག་རྒྱ་གཏད་པའི་དབང་
ངོ་། །དེ་ནས་རིག་མ་དེས་སྐྲ་བཤིག་གོས་དང་བྲལ་བར་བྱས་ནས། སློབ་མ་ལ། བཤང་གཅི་ལ་སོགས་བཟའ་བ་དང་། །ཁྲག་དང་ཁུ་བ་དེ་བཞིན་ཤ །རྟག་པར་བུད་མེད་མཆོག་གུས་པས། །བྷ་གའི་པདྨར་འོ་བྱེད་པ། །
15-241
བུ་ཁྱོད་སྤྲོ་བར་བྱེད་དམ་ཅི། །བུ་ཡིས་ཇི་ལྟར་བདེ་བར་སྨྲོས།། དེའི་ལན་དུ། བཤང་གཅི་ལ་སོགས་བཟའ་བ་དང་། །བུད་མེད་ལ་ཡང་རྟག་གུས་བགྱིད། བྷ་ག་ཉིད་ལ་འོ་བྱེད་པར། །ལྷ་མོ་
ཅི་ཕྱིར་བདག་མི་སྤྲོ།། ཞེས་བརྗོད་པས་ལྷ་མོ་དེ་མཉེས་ནས། གཅེར་བུ་པདྨ་རྒྱས་པ་ཁ་ཕྱེ་ནས་སློབ་མ་ལ་བསྟན་ཏེ། ཨེ་མ་ང་ཡི་པདྨ་འདི། །བདེ་བ་ཀུན་དང་ཡང་དག་ལྡན། །ཅི་
སྟེ་ཆོ་ག་བཞིན་བརྟེན་ན། །དེ་ཡི་མདུན་ན་ང་གནས་ཏེ །སངས་རྒྱས་བསྙེན་པ་ལ་སོགས་པ། །བྱ་བ་ཐམས་ཅད་པདྨས་བྱེད། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་ཡང་དག་གནས། །
བྷཉྫ་མོཀྵ་ཧོཿཞེས་གསུང་བར་བསམས་ནས། སློབ་མ་དང་རིག་མ་གཙོ་བོ་ཡབ་ཡུམ་དུ་བསྐྱེད། །ཕུང་ཁམས་སྐྱེ་མཆེད་བྱིན་གྱིས་བརླབ། །གོ་བགོ རྡོ་རྗེ་དང་པདྨ་འདུས་ཡུམ་གྱི་གཡོན་གྱི་ཆར་སོང་བའི་རྩའི་
རྩེ་མོ་ཧྲཱིཿདམར་པོ་དང་ལྡན་ལ། མཛུབ་མོ་དང་ལྕེ་སིཏ་ཅེས་བྱ་བས་བསྐུལ་ནས། ཨོཾ་ཤི་ཤི་ཤི་ཧ་ཧ་ཧ་སྭཱ་ཧཱ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་
ཝ་ཨཱཏྨ་ཀོ྅ཧཾ། ཞེས་བརྗོད་ཅིང་། རང་དང་བླ་མའི་ཐུགས་ཀ་ནས་འོད་ཟེར། གཤེགས་པ་གཤེགས་མ་སྤྱན་དྲངས་ལ་བཅུག །སྙོམས་འཇུག་གི་དགའ་བཞི་ཉམས་སུ་མྱོང་སྟེ། གང་ལ་ཐོག་མ་དབུས་མཐའ་མེད། །བདག་མེད་གཞན་ཡང་མེད་བ་སྟེ། །
15-242
སྲིད་མེད་མྱང་ངན་འདས་པ་མེད། །འདི་ནི་མཆོག་ཏུ་བདེ་ཆེན་ཉིད།། ཅེས་འོད་གསལ་གྱི་བདེ་བ་མྱོང་ནས། ཡང་ཧཱུྃ་ཞེས་ཐབས་ཀྱིས་གྱེན་དུ་དྲངས་པས། གསང་བར་དགའ་བ། སྙིང་གར་མཆོག་དགའ། དཔྲལ་
བར་ཁྱད་དགའ། གཙུག་ཏོར་དུ་ལྷན་ཅིག་སྐྱེས་དགའ་བརྟན་པར་བསམས།། མི་ནུས་པ་ལ་ལྕེས་བླང་ལ་བཏུང་ངོ་། །དེ་ནས་ཤེས་རབ་མ་མཉེས་ཏེ། དེའི་མགོ་བོར་ལག་པ་བཞག་ནས། དེང་ནས་གཟུང་སྟེ་
བུ་ཁྱོད་ཀྱིས། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་སེམས་ཅན་ཐམས་ཅད་ཀྱི། །དོན་ནི་བདག་ཉིད་ཀུན་གྱིས་བྱོས། །ཞེས་རྗེས་སུ་གནང་བ་སྦྱིན་ནས་མིག་དར་ཕྱེ། ཀུན་རྫོབ་བྱང་ཆུབ་སེམས་ཀྱི་
དཀྱིལ་འཁོར་མཐོང་། །དབང་གསུམ་པ་ཐོབ། ཡིད་ཀྱི་དྲི་མ་དག །ཕོ་ཉའི་ལམ་བསྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་བ་བཞག །ཐུགས་རྡོ་རྗེ་མངོན་དུ་འགྱུར་བའི་སྐལ་ལྡན་དུ་བྱས་སོ།། །།
༄། །དབང་བཞི་པ།
དེ་ནས་དབང་བཞི་པ་ཞུ་བའི་དོན་དུ་མཎྜལ་ཕུལ་ནས། ཁྱེད་ཀྱི་ཞབས་ཀྱི་བཀའ་དྲིན་ཀྱིས། །གཙོ་བོའི་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང་། བདག་ལ་བཀའ་དྲིན་རབ་ཏུ་གསོལ།།
ཞེས་གསོལ་བ་ལན་གསུམ་གདབ་ལ། དུ་བ་ལས་ནི་མེར་ཤེས་ཤིང་། །ཆུ་སྐྱར་ལས་ནི་ཆུར་ཤེས་པ། །བྱང་ཆུབ་སེམས་དཔའ་བློ་ལྡན་གྱིས། །རིགས་ནི་མཚན་མ་དག་ལས་ཤེས། །ཞེས་གསུངས་པས། དགའ་བ་སྣང་བ་ཡེ་ཤེས་ཏེ་བུམ་དབང་། 
15-243
མཆོག་དགའ་སྣང་བ་མཆེད་པ་སྟེ་གསང་དབང་། །ཁྱད་དགའ་སྣང་བ་ཉེར་ཐོབ་སྟེ་ཤེས་རབ་ཡེ་ཤེས། ལྷན་ཅིག་སྐྱེས་དགའ་ནི་ཐམས་ཅད་སྟོང་པ་འོད་གསལ་བ་སྟེ་དབང་བཞི་པ། དེ་ཡང་དྲི་མ་
དང་བཅས་པ་མ་ཡིན་ཞིང་། དེ་དཔེར་བྱས་ནས། དོན་གྱི་དབང་བཞི་པ་ནི། སཾ་པུ་ཊ་ལས། གང་ནའང་བསྒོམ་པ་པོ་མེད་དེ། །བསྒོམ་བྱ་ཅུང་ཟད་ཡོད་མ་ཡིན། །བསྒོམ་པ་ཉིད་ཀྱང་ཡོད་མིན་
ཏེ། །དེ་ནི་དེ་ཉིད་བསྒོམ་པར་འདོད། །ཅེས་གསུངས་པས། ལུས་མཉམ་པར་བཞག་པའི་སྤྱོད་ལམ་དང་ལྡན། ངག་རླུང་རྒྱུ་བ་སོར་བཞག །དབང་པོའི་སྒོ་ནས་གཟུགས་ལ་སོགས་པ་ཡུལ་རྣམས་ཀྱིས་དྲངས་པར་གྱུར་
ཏེ། ངོ་བོ་ཉིད་ཀྱིས་ཕྱི་རོལ་གྱི་ཡུལ་གཡོ་བའི་སེམས་ནི། ཡུལ་ལ་གཡོ་བ་བཟློག་པའི་ཕྱིར། ཕྱི་ཡུལ་གྱི་སྣང་བ་རྣམ་རང་ཡབ་ཡུམ་ལ་བསྡུ། ཡུམ་ཡབ་ལ། ཡབ་སྙིང་གའི་ཧཱུྃ་ལ། ཧཱུྃ་
གི་ཞབས་ཀྱུ་ཧ་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། ཐིག་ལེ་ནཱ་ད་ལ། ནཱ་ད་ཡང་ཇེ་ཕྲ་ཇེ་ཕྲ་ལ་མི་དམིགས་པར་གྱུར་ཏེ། དམིགས་པ་དང་བྲལ་བའི་
སེམས། ཅི་ལ་ཡང་མི་སེམས། གང་དུ་ཡང་མི་རྟོག་པ། བསྒོམ་བྱ་སྒོམ་བྱེད་བསྒོམ་པ་དང་བྲལ་བའི་ངང་ལ་ཡུན་རིང་དུ་བཞག་གོ །དེ་ལྟར་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཚིག་གི་སྒོ་ནས་ཐོབ། 
15-244
ལུས་ངག་ཡིད་གསུམ་གྱི་དྲི་མ་དག །ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་བདེ་བ་ཆེན་པོ་སྐུའི་ས་བོན་བཞག །ཡེ་ཤེས་རྡོ་རྗེ་མངོན་དུ་འགྱུར་བའི་སྐལ་ལྡན་དུ་བྱས་སོ།།
དེ་ནས་བླ་མ་ལ་ཕྱག་བྱས། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ཀྱིས།། ཞེས་བརྗོད། ལྷག་ཆད་བསྐང་བའི་ཞི་བའི་སྦྱིན་སྲེག་འགྲུབ་ན་ཡང་བྱའོ། །དཀྱིལ་འཁོར་ལ་མཆོད་ཅིང་
ཚོགས་ལ་ལོངས་སྤྱོད་མཆོད་ཡོན་ཕུལ། དགེ་རྩ་བསྔོ། དཀྱིལ་འཁོར་ལ་ལན་གསུམ་བསྐོར་བ་བྱས། །ཡི་གེ་བརྒྱ་བ་བརྗོད། ཨོཾ་ཁྱེད་ཀྱིས་སེམས་ཅན་དོན་ཀུན་མཛད།། ཅེས་སོགས་བརྗོད་ལ། ཡེ་ཤེས་པ་གཤེགས་དཀྱིལ་
འཁོར་བསྡུ། །རྡུལ་ཚོན་དོན་དུ་གཉེར་བ་ཡོད་ན་སྦྱིན། མེད་ན་རྒྱ་མཚོ་ལ་སོགས་པ་ཆུ་བོའི་དབུས་སུ་དོར་རོ། །དབང་གི་གནས་སྐབས་སུ་བདག་འཇུག་གི་ཚེ། བླ་མའི་བྱ་བ་རྣམས་དཀྱིལ་འཁོར་
གྱི་གཙོ་བོ་དང་། སློབ་མའི་བྱ་བ་རྣམས་རང་གིས་བྱེད་པར་བསྒོམ་མོ། །དེ་ལྟར་འཁོར་ལོ་སྡོམ་པ་ལྷ་ལྔའི་དབང་བསྐུར་བའི་ཆོ་ག་འདི་ཡང་། སྒྲུབ་སྡེ་བླ་མ་ཐོས་བསམ་གྱི་ནོར་གྱིས་ཕྱུག་
པ་རྒྱལ་དབང་ལྷུན་གྲུབ་ཀྱིས་ནན་ཏན་གྱིས་བསྐུལ་བའི་ངོར། ཤཱཀྱའི་དགེ་སློང་མི་ཕམ་པདྨ་དཀར་པོ་ཕྱོགས་ལས་རྣམ་པར་རྒྱལ་བའི་སྡེས། གཙང་མྱང་སྨད་ཀྱི་སའི་ཆ། གཡའ་ལུང་གི་རི་བོའི་མགུལ་དུ་སྦྱར་བའོ།། །།
15-245
མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ༴ རྣམ་པར་སྣང་མཛད་རབ་ཏུ་དགའ། །རྡོ་རྗེ་ཞི་བ་དགའ་བ་ཆེ། །རང་
བཞིན་གྱིས་ནི་འོད་གསལ་མཆོག །སངས་རྒྱས༴ རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་མཁའ་འགྲོ་དྲི་མ་མེད། །དངོས་ཉིད་དག་པ་གོས་པ་མེད། །རིན་ཆེན༴ རྡོ་རྗེ་དཔག་མེད་རྒྱལ་པོ་བྱེད། །མི་རྟོག་
ནམ་མཁའི་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ༴ རྡོ་རྗེ་དག་པ་གདོན་མི་ཟ། །བསམ་པ་ཐམས་ཅད་རབ་རྫོགས་བྱེད། །སངས་རྒྱས་ངོ་བོ་ཉིད་ལས་བྱུང་། །སྣ་ཚོགས་མཁའ་འགྲོ་ཕྱག་འཚལ་
བསྟོད།། ཅེས་པ་ཁ་འཕངས་ཀྱི་སྐབས་སུ་དགོས་པའོ། །མངྒ་ལཾ།། །།

